CATHARINA

I.

CATHARINA

Soror Henrici IV. Galliae Regis, Ducis Barrensis uxor, Reformatae Religionis cum lacte haustae tenacissima, Obiit A. C. 1604. Nanceii. Ob cuius mortem cum tota Regia in

luctu esset, simulque omnes exterorum Principum Legati, Pontificis Nuntius, quid ageret, aliquandiu incertus, tandem et ipse pullatus coram Rege compatuit, dicens: maiores se habere luctus causas, quam reliquos: suum enim Dominum et se lugere interitum animae, cum reliqui tantum corporis deflerent iacturam. Cui Rex, minime dubitare se de animae sororis salute, respondit, referente Bucholcerô, in Indic. Chron.

II.

CATHARINA

Soror Phoebi, Navarrae Regis uxor Iohannis Albretani. Item haeres Portugalliae, a Philippo II. exclusa, cuius posteri iterum thronô potiti. Item Regina Georgianorum, in Persia, martyrii coronam nacta, A. C. 1617.

III.

CATHARINA

filia Caroli VI. Galliae Regis nupsit Henrico V. Anglo, postmodum Ouvino cuidam, ex sartore Walliae Principi, qui capite plexus, sub Henrico VI. avia Henrici VII. Item filia Caroli VII. Galliae Regis, quae Carolo Burgundiae nupsit.

IV.

CATHARINA

virgo Alexandrina, a tribus Philosophis a pueritia exculta, ac deinde studio doctrinae caelestis dedita. Quae cum Maximinum cogentem Aegyptios ad ethnica sacrificia celebranda palam arguisset, primum carceri inclusa est, deinde ad disputationem cum 50. Grammaticis ac Rhetoribus educta, omnes vicit et ad fidem Christi convertit. Eos omnes Tyrannus trucidavit; Catharinam rotae impositurus erat, sed fulmen rotam disiecit; quare gladiô decollata est. A. C. 307. Corpus dicitur ab Angelis in montem Sina delatum esse. Vide Voss. de Philolog. c. 11. §. 3.